Dags: 09.02.2003 22:24
Ísland tryggði sér gullverðlaun á heimsmeistaramóti Alþjóða Íshokkísambandsins sem lauk í kvöld í Sarajevó í Bosníu & Hersegóvínu. Síðasti leikur liðsins var gegn heimamönnum og staðan var 9 - 2 fyrir Ísland. Í fyrsta leikhluta byrjuðu okkar drengir með látum Gauti Þormóðsson var búinn að skora eftir 7 sekúndur og Jón Ernst Ágústsson bætti öðru við þegar 47 sekúndur voru liðnar af leiknum. Yfirburðir okkar manna voru algerir í þessum fyrsta leikhluta var staðan 0 – 5 eftir hann.
Nokkuð rólegra var eftir þetta því að annar leikhluti var tíðinda minni og lauk honum 1 – 2 og staðan því 1 – 7 fyrir Ísland eftir annan leikhluta. Sama var upp á teningnum í þriðja leikhluta, þegar drengirnir gerðu sér grein fyrir að gullið var komið langleiðina heim var slökkt á afturbrennurum, og Bosníumönnum þyrmt við stórskotaárás, þriðja hluta lauk líka 1 – 2 sigri okkar, og endanleg úrslit því 2 – 9 og gullið okkar.
Gleðilegt var að sjá að liðið byrjaði með svona miklum krafti því að það virtist vera helsti veikleiki liðsins í fyrri leikjum hvað það var lengi í gang. Þetta er frábær árangur og stór dagur fyrir íslenskt Íshokkí. Liðið hefur með þessu tryggt sér sæti í annarri deild Heimsmeistaramótsins á næsta ári.
Mörk / stoðsendingar í þessum leik: Birgir Hansen 4/3, Gauti Þormóðsson 3/0, Jón Ernst Ágústsson 1/0, Úlfar Andrésson 1/0, Trausti Bergman 0/1, Vilhelm Bjarnason 0/1, Viktor Höskuldsson 0/1, Arnþór Bjarnason 0/1