Dags: 23.03.2009 21:10
Meistarflokkur SR vann frækinn útisigur á Skautafélagi Akureyrar í
fyrsta leik úrslitakeppi Íslandsmótsins í íshokkí. SR skoraði 6 mörk
gegn 5 mörkum Norðanmanna. Leikurinn var frábær skemmtun frá upphafi
til enda og nær fullt hús í Vetrarmiðstöðinni. Einn fjölmiðillinn
hafði það á orði í umfjöllun sinni að konur væru áberandi á
áhorfendapöllunum og komi það til vegna dagatalsins margfræga sem sýnir
SR leikmennina fáklædda á ísnum og væri það mál kvenna fyrir norðan að
nú væri mun meira gaman að horfa á leikmenn SR!
SA náði forystu snemma leiks eða strax á 2. mínútu er Einar Valentine
skoraði eftir stoðsendingu Björn Jakobssonar. Stuttu síðar eða á 7.
mínútu náði Gauti Þormóðsson að jafna leikinn þrumu langskoti í
"sammarann" og sá Ómar markvörður SA ekki pökkinn fyrr en hann þurfti
að snúa sér við til að ná í pökkinn í netið. En SA komst áður en
fyrstu lotu lauk í 2-1 með marki Jóns. B. Gíslasonar á 16. mínútu og
stoðsendingar voru frá Josh Gribben og Ingvari Þór Jónssyni.
Hafi fyrsta lota verið góð var önnur ekki síðri og okkar menn byrjuðu á
því að jafna leikinn og aftur var að verki "Family-Thormodsson", nema
að nú var Egill þar að verki á 24. mínútu, eftir stoðsendingu Daniel
Kolar. Akureyringar sóttu grimmt og gerðist Steinar Grettisson svo
grimmur hann náði að skora tvö mörk, en að vísu náuðu SR-ingar ávallt
að svara fyrir sig, í fyrra skiptið Egill Þormóðsson á 31. mínútu
(Daniel aftur með stoðsendingu) og síðan var það Daniel Kolar á 33.
mínútu sem geystist upp svellið og jafnaði í 4-4.
SR-ingar komu grimmmir til leiks í þriðju lotu og náðu að komast yfir
5-4 á 42. mínútu, og varð það hlutverk Gauta koma pekkinum aftur
framhjá Ómari í netið, eftir stoðsendingar Daniel Kolar og Guðmundar
Björgvinssonar. Um miðbik lotunar var lúalega brotið á fyrirliða SR
Steinari Páli þegar hann var kominn einn inn fyrir vörn SA og frábær
dómari leiksins Mike Kobetzda (vona að ég stafi nafnið hans rétt), sá
sér ekkert annað fært en að dæma víti. Það kom í hlut Daniel Kolar að
taka vítið, sem því miður fyrir okkur SR-inga fór það forgörðum. Þarna
hefðu SR-ingar verið með pálmann í höndunum, en annað kom á daginn, því
stuttu síðar eða 54. mínútu kom biðdómur á SR, Ómar markmaður SA
geystist útaf, og SA bætti 6. útileikmanninum inn á ísinn og vörn SR
mátti ekki við margnum og Jón B. Gíslason náði að jafna leikinn í 5-5,
Björn Jakobsson með stoðsendingu og allt að verða vitlaust.
En leikmenn SR sýndu svo sannarlega úr hverju þeir eru gerðir og á 57
mínútu eða þremur mínútum fyrir leikslok, náði Steinar Páll að þruma
pekkinum í mark SA, af löngu færi og koma SR-ingum yfir 6-5.
Stoðsendingar hér þeir Pétur Maack og Svavar Rúnarsson. SA reyndu allt
hvað þeir gátu til að jafna það sem eftir lifið leiks, en yfirveguð
spilamennska og frábær barátta skiluðu SR-ingum fyrsta sigrunum í
úrslitakeppinni.
Þó sigur SR hafi í verið sigur liðsheildarinngar, þar sem menn börðust
grimmt, létu pökkinn ganga og "spiluðu fyrir liðið", verður ekki hjá
því komist að koma aðeins inn á þátt markmanns okkar SR-inga, Ævars
Þórs Björnssonar. Hann verður ekki sakaður um mörkin sem hann fékk á
sig, en oftar en ekki á mjög mikilvægum augnablikum í leiknum sýndi
hann stórkostlega markvörslu og hélt þannig okkar mönnum inni í leiknum.
Staðn 1-0 fyrr SR í einvíginu og næsti leikur í einvíginu er í
Skautahöllinni í Laugardal á miðvikudaginn og hefst kl. 19:00. Það er
skyldumæting fyrir ALLA SR-inga og með öflugum stuðningi ykkar og
baráttu og leikgleði okkar manna sem einkenndi síðasta leik, eru okkar
mönnum allir vegir færir.
ÁFRAM SR!
Tölfræði
SR
Mörk:
Egill Þormóðsson 2/0
Gauti Þormóðsson 2/0
Daniel Kolar 1/3
Steinar Páll Veigarsson 1/0
Guðmundur Björgvinsson 0/1
Svavar Rúnarsson 0/1
Pétur Maack 0/1
Brottvísanir: 20 mín.
SA
Steinar Grettisson 2/0
Jón B. Gíslason 2/1
Einar Valentine 1/0
Björn Jakobsson 0/3
Josh Gribben 0/3
Ingvar Þór Jónsson 0/1
Brottvísanir: 32 mínútur